用户名 密码
| 网站首页 | 论坛首页 | 博客首页 |
 首页 | 文件通知 | 示范校园 | 校园动态 | 校本教研 | 学科教研 | 教师学习 | 园丁风采 | 学生乐园 | 教学资源 | 海量阅读 | 全面改薄 |
    当前位置:芦溪教育网】→【学生乐园】→【故事屋】→文章浏览 进入论坛发表新主题  进入到论坛模式

《柳宝的故事》(19)--恰年饭 - lxjyw.net《柳宝的故事》(19)--恰年饭
[字体:  ] [ 发布:教研室【李忠】   评论:0   点击:1453  日期:2014/2/16 19:36:05] 编辑文章

 

每次要过年是柳宝既兴奋又操人个事,兴奋个是可以得压岁钱切宜春,跟伯伯个几扎崽------兵哩牙哩、猫几牙哩、军古坨一起撒哩,操人个是挤死人个班车还有恰不完个年饭。

过年坐车挤得人死个事已经哇故哩,其实还有一扎就是柳宝晕车,车子几远开的来,脑壳就已经车晕个切哩。每坐一次就呕的胆水都出来,个乃哩是切恰饭,简直就是切收命!下嘎车面都是揪青个,演鬼片妆都不要化。用现在时髦个词来形容,也可以算的上是一扎几“呕像”。

呕一路切都算哩,每次到西村上石伯伯屋里进门就恰中饭,个就真个不得完!乡下哩热情似火,一进门帮你放嘎东西就拖到上桌,坐上。桌子上蔬菜冇一碗,都是大肉大鱼,个就是真个是大的一下几!腊肉有大人巴掌个大一块,窑砖一样个厚,冇的半斤也有二两!弯边个姆姆夹一股上来,饭碗都罩瓜哩。柳宝本来胃喽哩就翻江倒海,看到该股几肉直翻白眼,两滴眼泪滚呀就下来哩------娘老子哦!!

中午个饭还在喉咙管里,夜饭就有人来喊。柳宝爷老子八姊妹,每扎伯伯姑姑最少都是三到六扎个崽女,你想:萍乡个叔叔或舅舅来哩侄子外甥个乃哩不要喊到恰一餐几?所以哇,不要哇折手指脑就是折脚趾脑,该扎年恰年饭都恰不完,而且桌子上基本上都是千篇一律----“大”肉“大”鱼。当然还有几碗配菜要哇一下,一碗是番薯丸子,一碗是放糖个煎糍粑,还有是中间加红周米个三角煎炸刨豆腐。柳宝每日恰饭也是线鸡公打水----表表意思。有次恰得不得何哩,一扎隔得远点几个嫂老子喊恰饭,柳宝是生死不切,最后是躲到猪栏屋都把她哩捉嘎出来哩,捉特务样,一边一个拖嘎走嘎个。桌子上柳宝一扎菩萨样,饭冇恰一粒。有时实在肚子饥哩,柳宝就捉到果子出气,打扎屁都是番薯片个味道。

宜春乡下哩柳宝发现一扎不一样个地方,每次切做客,一进切就会接到送上来个一扎酒瓯子,而不是跟屋里样一扎茶杯子。第一次柳宝还以为是酒,手个所摆哇不要,打飞脚走嘎哩,后背看到别人都恰得嘻笑个,也试到端哩一杯,哎呀!蛮好恰!!瓯子几喽哩一把个小铜勺子几,放哩黄豆子几、姜丝几、苏兜叶子,有一细东西不认得.....等尝到哩味道,柳宝恰嘎一二十杯,跟艳花姐哇:还要!还要!!柳宝看到该把几小铜勺子蛮喜欢,想到回萍乡也个所几恰,等别人不注意,刺溜!一把勺子几就到兜几哩切哩。几工下来柳宝个鼻子眼烘烘叫个冒火,嘴巴角都恰烂哩,早晨起来刷牙个时候,在嘴巴两边角上赶快涂点几中华牙膏。

柳宝印象深刻的还有,伯伯姑姑屋里个床都好像留哩蛮久个老古董,床边上雕哩蛮多龙啊凤啊花草树木之类的,连帐子上还挂哩一些铜钱,不过床铺下哩还是垫个秆。柳宝趁人家困着哩,无一例外都扯哩几扎下来做纪念。铜钱中间一个方眼,周边模模糊糊的有四个字“康熙通宝”。只是乡下哩都养狗,困几工柳宝把狗蚤牙的一身个包,身上刮的稀烂。

初一大朝(早),姆姆就打爆竹喊柳宝、猫几牙哩起来恰饭。“又是恰!马扎西!一工到夜都是恰哦!”柳宝扯懒腰憋哩一句,姆姆听到哩,赶紧跑进来跟柳宝几个轻轻几哇:嘿!初一大朝不肯骂人不肯讲丑事做坏事哈!菩萨晓得哩,你就会肚子痛!一上桌子,柳宝就真个肚子痛,好料!菩萨显灵哩?!想到兜几哩几扎铜钱,柳宝边跑边打默声。乃哩是咋个菩萨显灵,该几工恰多嘎哩火气,两三工冇上厕所哩。所以哇,冇的恰是扎蛮苦个事,有恰也是扎蛮苦个事。

后背几柳宝回萍乡就问他哩爷老子,罗哩过年乡下里都是大肉大鱼蔬菜都冇一碗哦?还有就是肉鱼罗哩都切个大一股,个乃哩牙的进?柳宝个爷老子就哇起他:乃几要理解,乡下哩日子是都比较苦,平时几只有萝卜擦菜几恰,冇的肉恰个,只有过时过节个时候来哩客才可以打一下几牙祭,所以蔬菜该细是不上席个;另外,肉个大一块也是有原因个,乡下哩大肉大鱼是客气个表现,客一来上桌,肉切的个滴滴几,人家都不好意思动筷子,显得该扎屋里小哩子家气。

哦!柳宝终于晓得哩,对自己宁可苦点几,但对客一定要热情大方。个就是为咋哩每次到乡下哩来,伯伯姑姑他哩个所客气,走该时几总是把自己屋里最好个腊鸡腊鱼腊肉还有番薯米古、糍粑拿出来,注子一蛇皮袋把爷老子。结果有次回来等车,在东门道口个车子上就有人问柳宝个爷老子:“师傅!你该些腊肉罗哩卖?”

 

 

 


[本帖由 李忠 最后编辑于 14-2-16 19:36]

  分享到:分享到新浪微博 分享到腾讯微博  编辑文章】 【 】 【 加为精华 】 【删除主题】 【打印此文 关闭窗口


 相关文章